Investigan a orixe do incendio no que morreron dúas mulleres en Ourense
Ocorreu este sábado nunha vivenda do barrio de Covadonga
A Policía Xudicial investiga a orixe do incendio rexistrado este sábado nunha vivenda do barrio de Covadonga, no concello de Ourense, no que morreron dúas mulleres.
Foi a propia veciñanza a que alertou os Servizos de Emerxencias a primeira hora. As lapas que saían pola fiestra obrigaron a desaloxar o edificio.
A evacuación fíxose porta a porta porque os timbres neste bloque non funcionan cando chove por problemas de humidade.
Tras controlar o lume, os servizos de extinción confirmaron que no interior había dúas mulleres falecidas: a residente habitual, Valentina, de 71 anos, e a súa amiga Edilma, de 50, que pasaba uns días con ela.
O equipo técnico que revisou o edificio asegura que o inmoble non sufriu danos estruturais. Un equipo da Policía Xudicial inspeccionou nas últimas horas a vivenda e traballa xa no informe que achegará para tentar determinar as causas.
