"Ides ver como arde", di mentras lle prende lume a un camión ocupado en Ribeira
Barállase a vinganza porque o camión era o fogar un senegalés que puido ter un enfrontamento co atacante
A cabeza do tráiler leva anos abandonado no porto, embargada por Facenda, malia as críticas dos transportistas
Había sospeitas e confírmanse. Vese nun vídeo colgado en redes do momento en que lle prenden lume ao camión que ardeu no porto de Ribeira. Identifícase un delincuente reincidente da vila, a quen todos coñecen e que hai un par de anos xa lle prendera lume a unha casa. Coméntase, pero é só un ruxerruxe, que tivera unha discusión co senegalés que fixo da cabina o seu fogar.
"Movemento víase. Viñan a pillar porque se supón que o home este pasaba mercadoría", comenta un mariñeiro.
A porta do camión aberta, tal como se ve nos primeiros vídeos, foi o primero indicio que fixo saltar a lebre.
"Dise que lle botaron un produto acelerante deses que fal saltar todo", especula outro home que frecuenta o porto.
O certo é que o lume prendeu nun visto e non visto e nuns minutos a cabina quedou envolta polas lapas.
"Empezou a saír fume pola porta e en cinco minutos foi todo polo aire porque el tiña aí todo. O que se ve é roupa que tiña el. Quedou sen nada", lamenta o mariñeiro.
"Cando chegamos xa vimos que o incendio está moi evolucionado, que está ardendo a cabeza tratora e os tanques de combustibl. Hai roupa acumulada e enseres na cabina pero non localizamos a ningunha persoa", confirma Moisés Fernández, cabo do Parque de Bombeiros de Ribeira.
O camión levaba anos abandonado. Protestaran os transportistas e tamén Portos de Galicia, que o tiña declarado residuo urbano, pero pouco se puido facer porque estaba embargado por Facenda.
"A empresa foi á quebra. Mesmo había dous furgóns tamén, que nun vivía un marroquí que agora vive noutro lado", lembra o mariñeiro.
"Pídese que se retire porque non hai moitos estacionamentos de camións aquí no porto", explica outro traballador.
O senegalés que vivía alí non se deixou ver nas últimas horas. É un home de preto de 50 anos que leva anos asentado en Ribeira e que mesmo traballara no mar.
