Investigan a aparición de restos óseos humanos na costa de Noia

A Garda Civil abriu unha investigación tras a aparición duns restos óseos humanos no litoral de Noia, que foron localizados por un particular.

Segundo informaron fontes da Comandancia, o achado foi realizado este mércores ao mediodía por un veciño que estaba a pasear pola zona da Barquiña e que, coa baixamar, observou na ribeira o que parecían un cranio e outros ósos.

A Garda Civil recolleu os restos e determinouse o seu traslado ao Imelga para coñecer canto tempo levarían no mar, a súa procedencia e se hai indicios dalgún delito.

O achado tamén se puxo en coñecemento do Xulgado de Noia. Así, a maxistrada da praza 1 de Noia abriu dilixencias previas á espera de recibir o informe do patólogo do Imelga, segundo sinalaron fontes do Tribunal Superior de Xustiza de Galicia (TSXG), que tamén apuntaron que "en principio, todo parece indicar que son ósos humanos".