Ingresa en prisión Martiño Ramos, o exprofesor ourensán extraditado desde Cuba por violar unha menor
Ingresa en prisión Martiño Ramos, o exprofesor ourensán extraditado desde Cuba por violar unha menor
Martiño Ramos Soto permanece nunha prisión madrileña á espera do que decidan os órganos xudiciais
Condenado en xullo de 2025, Ramos Soto non atendeu o auto de entrada en prisión para cumprir a pena e fuxiu a Cuba, a onde chegou desde Portugal e O Brasil
Martiño Ramos Soto, o exprofesor ourensán detido en Cuba tras fuxir para non cumprir unha condena de 13 anos e medio de cárcere por violar unha menor de idade, ingresou en prisión este xoves despois de ser extraditado.
Segundo informaron a EFE fontes xurídicas, unha vez en Madrid a Policía trasladou a Ramos Soto aos xulgados de Praza de Castela, onde o órgano que estaba de garda de dilixencias (o de instrución número 44) ditou o mandamento de ingreso en prisión.
As fontes precisaron que se trata dunha persoa condenada pola Audiencia Provincial de Ourense e foi este órgano o que ordenou a súa procura e o seu ingreso en prisión, que agora se materializa nunha prisión madrileña á espera de que o que se decida posteriormente polos órganos competentes.
Este xoves chegou a España e foi custodiado ata os xulgados por axentes da Policía Nacional, segundo confirmou este Corpo, que lembrou que o fuxitivo estaba na lista dos "10 máis buscados".
Este profesor de 50 anos e coñecido activista político foi arrestado na Habana en novembro pasado, en cumprimento dunha solicitude da Audiencia Provincial de Ourense e tras un proceso de colaboración entre ambos os países.
Segundo informou a Sección de Fuxitivos da Policía Nacional, Ramos Soto é natural de Ourense e foi condenado a 13 anos e medio de prisión por abusos sexuais a unha alumna menor de idade, mediante prácticas sádicas, cando a vítima tiña entre 12 e 16 anos.
Unha vez foi condenado en xullo de 2025, Ramos Soto non atendeu ao auto de entrada en prisión para cumprir a pena. Entón emitiuse unha orde de detención nacional, aínda que os axentes tiñan xa indicios de que o condenado se atopaba fóra de España.
Segundo a reconstrución policial da súa fuga, Ramos Soto desprazouse en xullo a Portugal para, desde Lisboa, voar ao Brasil. De alí viaxou ao Perú e logo, finalmente, a Cuba. A Policía española consideraba que o condenado contaba con algún apoio na illa.
Alén de exprofesor de educación infantil e primaria, Ramos Soto é exmilitante da extinta En Marea e coñecido na súa cidade, Ourense, por impartir clases de música e polo seu activismo.
