O presunto autor do crime de Abadín tenta fuxir do cárcere de Bonxe e trasládano a Teixeiro
Os funcionarios da prisión localizaron varios cortes na súa cela, circunstancia que os alertou dun posible intento de fuxida
O investigado recoñeceu que atropelou accidentalmente a Enrique Bolívar, asustouse e subiu o cadáver do home ao seu coche para abandonalo nun piñeiral próximo
O presunto autor do homicidio de Enrique Bolívar, veciño de Abadín, foi trasladado á prisión de Teixeiro despois de que os funcionarios do cárcere de Bonxe, onde permanecía en prisión provisional, detectasen indicios dun posible intento de fuga.
Fontes penais consultadas por Europa Press confirmaron que o traslado se produciu o 2 de setembro.
Actualmente, o home atópase nun módulo de réxime ordinario e non causou problemas desde a súa chegada ao centro penal de Teixeiro.
Os funcionarios localizaron cortes na cela
Os funcionarios localizaron, o 28 de agosto, varios cortes na súa cela, circunstancia que lles alertou dun posible intento de fuga.
Oíronse uns ruídos fóra do normal e os funcionarios acudiron á cela en cuestión e observaron que unha das fiestras podía estar manipulada, lixeiramente manipulada, como moito que empezaran ese mesmo día a serrar a reixa", asegura Carlos Gundín, da Asociación Profesional de Funcionarios de Prisións.
"Unhas reixas non son fáciles de arrancar nin serrar, iso non se fai dun día para outro, e precísanse medios e hoxe en día a lima no bocadillo é algo inviable. Si se dera a posibilidade remota de romper as reixas dende aí non se sae para a rúa, tes patios, muros, concertinas...", engadiu Gundín.
Atropelou a Enrique Bolívar, desaparecido desde 2023
O pasado mes de abril, a maxistrada do Tribunal de Instrución número 2 de Mondoñedo decretou o seu ingreso en prisión provisional comunicada e sen fianza. Durante unha primeira declaración ante a xuíza, o investigado recoñeceu ser o autor dos feitos.
O investigado explicou que atropelou accidentalmente a Enrique Bolívar, asustouse e subiu o cadáver do home ao seu coche para abandonalo nun piñeiral próximo, lugar ao que conduciu aos axentes. Días despois o seu coche apareceu calcinado en Ribadeo.
Esta declaración tivo lugar días despois de que os restos óseos atopados nunha leira de Quende e remitidos ao departamento de Bioloxía do Servizo de Criminalística, en Madrid, coincidisen co ADN de referencia de Enrique Bolívar.
