Detectan un grupo de hackers prorruso disposto a atacar o sistema electoral español
Denomínanse NoName057, teñen ramificacións en España e xurdiron tras o incicio da guerra de Ucraína
Todo partiu da detención en Burgos esta semana dun activista deste grupo e da incautación de documentación e dun arsenal de armas
Nos últimos dous anos lanzaron 400 ciberataques só no noso país, algúns contra institucións do Estado, e hai indicios de que pretenden actuar o 29-N
A Policía Nacional detectou que o grupo de hacktivistas prorruso NoName057(16), nado tras a guerra de Ucraína, deu un salto nas súas ameazas en España para, ademais de lanzar ciberataques contra o sistema electoral e institucións do Estado, 'sinalar' nas súas canles na internet a mandos policiais e tamén a negocios rexentados por ucraínos.
Así se desprende da investigación que permitiu o pasado martes deter en Burgos un cidadán español de 51 anos acusado de tratar de constituír a "primeira célula" en España de NoName057(16), o grupo de ciberterrorismo detrás de máis de 400 ciberataques só no noso país desde 2024.
A este exvixilante de seguridade sen coñecementos informáticos intervéuselle un arsenal de armas e, segundo informou a Policía Nacional nunha nota de prensa, os axentes frustraron que dese o salto para "iniciar accións violentas".
Ás poucas horas de pasar pola Audiencia Nacional e quedar en liberdade provisional con medidas cautelares, desde as canles de NoName057(16) difundíronse mensaxes intimidatorias e insultos contra o mando policial á fronte da unidade que procedera á súa detención, segundo desvelan fontes da investigación a Europa Press.
Desinformador ruso
A mensaxe contra este mando difundiuse desde unha canle vinculada a NoName057(16) que leva por nome 'Desinformador ruso'. Tanto os Servizos de Información como os de Intelixencia españois téñeno desde hai meses baixo o radar porque consideran que detrás está Enrique Arias Gil, un español que figura entre os obxectivos prioritarios tras fuxir a Rusia e ao que se sitúa nunha posición destacada dentro do grupo de hacktivistas.
España é un dos obxectivos habituais de NoName057(16), segundo lembran as citadas fontes, remitíndose á serie de ciberataques que van desde as webs do Ministerio do Interior, Moncloa ou a Xunta Electoral Central, como ocorreu durante as eleccións xerais de 2023.
As citadas fontes consideran altamente probable que este mesmo grupo repita as súas accións con motivo das eleccións xerais do 29N, como tamén fixeron noutras citas coas urnas en diferentes países europeos.