Incomunicados dende hai medio ano en Cervantes pola caída dunha ponte

A ponte que comunica Vilaxán, na parroquia cervantega de Mosteiro, coa súa contorna, derrubouse a pasada primavera. Dende entón, os veciños do lugar teñen que dar rodeos de ata vinte quilómetros para chegar ata a outra beira do río Cancelada, afluente do Navia.

Ademais, vense privados de servizos como a recollida do lixo ou a entrega de butano, xa que os camións non pasan entre as casas. E tampouco atravesaría a aldea, en caso de necesidade, un vehículo de emerxencias.

Tanto a veciñanza deste lugar coma a dos arredores aseguran que levan meses queixándose da falta dunha ponte. Malia todo, polo momento descoñecen cando van poder recuperar unha infraestrutura tan necesaria no seu día a día. 

Mentres o acceso principal ás súas vivendas segue cortado, os residentes nesta zona dos Ancares temen que a situación empeore cando chegue o inverno.