Os veciños de Verea Vella, en Ourense, denuncian problemas para acceder ás vivendas
Alertan de que o mal estado da rúa e a saturación de vehículos que aparcan na zona complican a actuación dos servizos de emerxencia e mesmo a entrada a pé nos edificios
Reclaman, ademais, a renovación da rede de saneamento con máis de medio século de antigüidade e continuas avarías
Son máis dun cento os veciños que viven na antiga urbanización social da Verea Vella, uns edificios construídos hai máis de medio século na marxe dereita do Miño. A maior parte dos residentes son xente maior que cada día se atopa con máis dificultades para acceder ás súas vivendas.
Ás fochancas e a un muro medio derrubado, úneselle a saturación de coches que aparcan zona impedindo, moitas veces, o paso de camións ou outros vehículos de emerxencias. Reclaman que se regule o aparcamento e se acondicione a rúa para mellorar a mobilidade na zona.
Non é a única queixa. A antigüidade da rede de saneamento fai que as roturas sexan algo habitual, din, asolagando os baixos. Xa presentaron varias reclamacións. Piden que se renoven aproveitando as obras do futuro Parque de Canedo que requiren do paso de canalizacións pola zona.
