Róubanlle 4.000 euros en Baiona mediante 40 cargos na súa tarxeta

 Un total de 4.000 euros é a cantidade que desapareceu da conta corrente da vítima dunha estafa en Baiona  despois de que os responsables efectuasen 40 cargos non autorizados na súa tarxeta bancaria, segundo informou este martes a Garda Civil.

A denuncia foi presentada o pasado día 20 no Posto da Garda Civil de Baiona-Nigrán, despois de que a vítima detectase os cargos na tarxeta de crédito asociada á súa conta bancaria.

Os cobros adoitan comezar con importes reducidos para comprobar que a tarxeta está activa e tratar de que os movementos pasen desapercibidos, aínda que, se non se detectan, os cargos poden aumentar progresivamente ata alcanzar cantidades elevadas.

Os datos necesarios para efectuar estas operacións, como o número de tarxeta, a data de caducidade ou o código de seguridade, poden ter sido obtidos mediante técnicas como o phishing ou o smishing, páxinas web falsas, filtracións de datos ou programas maliciosos instalados nos dispositivos.

Por iso, a Garda Civil recomenda revisar con frecuencia os movementos bancarios, activar as alertas das entidades e non facilitar datos bancarios a través de chamadas, correos ou mensaxes non solicitados.