Aparece un coche accidentado en Portas pero non se sabe do condutor

Os veciños de Fontenla, en Portas, descubriron esta mañá un coche envorcado na estrada que, despois de bater nun valado, foi parar contra un poste. Dentro non había ninguén e a Garda Civi investiga como se produciu o sinistro e por que o condutor abandonou o vehículo.

"Encontrei o coche envorcado, sen ninguén dentro e non se sabe de quen é o coche. Debía vir a bastante velocidade, porque para pegar aquí e dar volta ata ir bater ao poste..." asegura un veciño

Ao non ser á beira das casas, os veciños non escoitaron golpe de noite e tampouco saben como puido marchar do lugar o condutor sen dar ningún tipo de aviso para que retirasen o vehículo. Non hai constancia de que alguén quedase ferido e pola posición do coche parece que o condutor tivo que saír pola ventá do acompañante.

Efectivos de Protección Civil de Portas e da Garda Civil de Tráfico acudiron á zona ata a chegada dun guindastre. A investigación determinará quen conducía e como foi o accidente.