Reclaman un transformador para acabar coas caídas de tensión nas aldeas de Irixoa
Veciños do Campelo denuncian continuas caídas de tensión e piden solucións
Na parroquia de Verís, en Irixoa, hai aldeas nas que a electricidade vai e vén. O problema é vello, pero agravouse nos últimos anos, coa chegada de novos habitantes que demandan un servizo adaptado aos tempos, que lles permita vivir, e tamén traballar, no rural.
Na casa de Ricardo Pérez celebraron en familia a festividade do Pilar. El naceu no Campelo e, aínda que parte da semana a pasa na Coruña, este pequeno núcleo de apenas dez habitantes segue sendo o seu fogar e o seu refuxio.
Por iso aplaude a chegada de novos veciños, como Carlos e Eva, unha parella que vive na aldea desde hai dez anos. Teñen unha nena pequena e moitos problemas derivados dos fallos na subministración eléctrica.
"Á hora do baño, quedamos sen luz e á hora da cena, o mesmo: a indución da vitrocerámica dá error, o forno non funciona e o microondas, tampouco", láiase Eva Pividal.
"De noite se prendes o forno e a cociña salta o automático", denuncia Ricardo.
As caídas da tensión agrávanse nos meses do verán e nas fins de semana, cando veñen os veciños cunha segunda residencia aquí. Carlos xa denunciou as deficiencias do servizo hai nove anos. Daquela a distribuidora envioulles un técnico que adiantou unha posible solución.
"Dixo que tiñan que poñer un transformador novo para nós, porque estamos ao final da liña e chega un momento en que non hai electricidade. O transformador non dá para todo o que hai", explica Carlos Montero.
Todo quedou nunha declaración de intencións e por iso os veciños acaban de presentar unha reclamación conxunta en Industria. Agardan que o novo transformador non tarde en ser unha realidade.
