Unha muller salva a vida ao espertar e atopar a casa chea de lume en Pontevedra
Unha muller salva a vida ao espertar e atopar a casa chea de lume en Pontevedra
O incendio comezou no cadro eléctrico
A rápida actuación dos servizos de emerxencia evitaron un drama este domingo na rúa San Antoniño, en Pontevedra. E todo tamén grazas a que a propietaria espertou a tempo de poder fuxir do fume e das lapas.
Conta Rosa Fandiño que "eran as tres e pico da mañá, eu estaba arriba no meu cuarto, e chegou un ruído. Estaba durmida, pero espertei, e pensei se deixara algo ao lume. Baixei e aquí xa foi terrible, saían as chamas todas por aquí e o meu medo é que pasara aos mobles".
Só ten palabras de agradecemento para os bombeiros, policía e persoal sanitario que acudiron rápido á súa chamada desesperada. O xefe do corpo de Bombeiros de Pontevedra Vicent Ferrería di que "chegamos á vivenda provistos dos equipos autónomos de respiración e a cámara térmica e se observa nada mais entrar que hai un cadro eléctrico que está inflamado na súa totalidade. Neste caso a persoa xa fora evacuada da vivenda. Procedeuse á extinción cun extintor de CO2 porque estaba moi localizado o incendio. O máis laborioso foron as tarefas de ventilación, porque por mor do fume viuse afectada toda a vivenda".
Rosa volveu nacer, pero de momento ninguén lle quita o medo do corpo.