Amplo dispositivo de medios na ría de Vigo no simulacro dun incendio nun buque
Trátase de mellorar a coordinación entre os equipos de emerxencias
O exercicio recrea o incendio dun vehículo no interior dun dos buques que emprega o sector da automoción para o seu transporte
En plena navegación, a tripulación dun buque cargado con máis de 5.000 coches detecta un incendio. Unha situación que desta vez é ficticia, pero que podería darse en calquera momento.
Ademais de embarcacións, lanzando auga dende o exterior, para acceder ao barco e atallar o lume o mellor é contar con equipos especializados, neste caso chegados en helicóptero.
A fábrica viguesa de Stellantis exporta case o 90 % da súa produción por barco. Foron os encargados de explicar como traballar no incendio dun vehículo eléctrico. Esas cifras de exportación levaron a desenvolver o operativo en Vigo.
Este simulacro forma parte dun exercicio nacional de loita contra a contaminación mariña.
