Identifican a parella que deixa pufos na hostalería de Santiago

Adoitan actuar en parella, sentan na mesa máis afastada da terraza e piden, sen cortarse, o mellor da carta.

"Pediron percebes, lagostinos, navallas e de segundo un chuletón de dous quilos, sobremesa e champaña", explica Avelino Carreira nun restaurante da cidade.

Cando chega o momento de pagar marchan sen ser vistos, inventan escusas se os collen e mesmo se poñen agresivos.

"Ao compañeiro que a seguiu agrediuno verbalmente, e cuspiulle, un desastre. Deixaron un pufo de 200 euros e non lles pasou nada, andan por aí tan panchos", lamenta Avelino.

Os dous restaurantes da praza de San Clemente tamén foron estafados pola parella, que foi identificada pola Policía. Ambos teñen antecedentes e son conflitivos, especialmente el, que pasou por prisión e acumula roubos e furtos. Os hostaleiros séntense impotentes, porque, se a conta non sobe de 400 euros, a pena é unha multa.

"No noso restaurante a muller fuxiu sen pagar 90 euros en chuletón e tres pizzas, pero tamén pensas denunciar e dinche que non vale de nada. Se non son máis de 400 euros, cóóllenos e sóltanos", di Jimena Sodorini, noutro restaurante.

A lista de pufos da parella é longa e non cesa. Desde a Asociación de Hostaleiros animan a que todos denuncien, xa que a reiteración de casos podería agravar o delito e disuadilos de novos banquetes gratuítos.