Outros 18 locais de hostalería de Galicia reciben un Solete Repsol na campaña de Nadal

Cada lugar ten os seus locais de hostalería que destacan polo bo ambiente e por algunha oferta singular e apetecible. Desde 2021, os expertos en gastronomía da Guía Repsol van avaliando estas tascas, tabernas, cafeterías, bares ou casas de comidas e recoñecen cun emblema, o Solete, a súa singularidade.

A churrería La Quinta, de Santiago, acaba de sumarse á listaxe e o seu promotor, Ibai Castiñeiras, di que está encantado co recoñecemento, pero que aínda non tivo tempo de asimilalo.

Ibai é a quinta xeración dunha saga de churreiros ambulantes de Pontecesures, pero, á hora de darlle o relevo á avoa Fina, hai un par de anos decidiu optar por un local fixo en Compostela. Tanto o nome coma a decoración do local honran o legado familiar, pero el e o seu equipo tamén van innovando.

O que máis sae son os churros clásicos, pero tamén os fan recheos de crema ou chocolate. E das moitas probas que foron facendo, hai uns que tiveron éxito desde o principio e que xa forman parte da súa identidade: os churros con topping de kinder-nutella.

Aínda que o boca directo é o das redes xa fora consolidando a súa clientela, Ibai conta que o Solete que acaba de gañar vai axudar a ampliala e celébrao coma unha honra para a saga familiar da que provén.   

Os Soletes de Nadal 2025

A Guía Repsol presentou máis de 300 Soletes de Nadal repartidos por case todas as provincias de España, 18 deles en Galicia. En total, a comunidade galega conta con 342 Soletes. Estas son as novas incorporacions por provincias:

A Coruña

• Betanzos: Bodega 83 (Rúa Castro, 13)
• Santiago de Compostela: A Tasquiña da Senra (Rúa da Senra, 4) e La Quinta (Rúa da Caldeirería, 42)
• Ferrol: Zahara (Rúa da Caldeirería, 42)

Lugo

• Foz: Casa Damián (Paseo de Colón, 5)
• Monforte de Lemos: Moure (Rúa Chantada, 16) e Garden Monforte (Avenida de Galicia, 13)
• Guitiriz: Panadería La Esquina (Rúa Deputación, 3)

Ourense

• Ourense: Ollo Kanalla Kfé (Parque das Mercedes, 5) e A Nené Ultramarinos (Rúa San Miguel, 5)
• Allariz: Vinoteca A Micalla (Plaza Mayor, 5)
• O Carballiño: Restaurante Pulpería Casa Gazpara (Rúa das Flores, 2)

Pontevedra

• Poio: Casa Ces (Avenida Porteliña, 15) e Tintanegra (Avenida Francisco Regalado, 44)
• Pontevedra: Confitería Solla (Rúa Michelena, 7)
• Silleda: Parrillada El Gaucho (Lugar Lamela, 6)
• Cambados: Vago Viños Brasería Cambados (Plaza Asorey, 3, bajo)
• Redondela: Restaurante Regato Praia (Paseo de la Playa, 10)

Nesta edición de Nadal incluíron como novidade a distinción a congregacións relixiosas para que os mellores fornos conventuais reciban o recoñecemento polas receitas centenarias herdadas e o seu desempeño artesanal. Pero entre os 27 mosteiros premiados por toda España, non figura de momento ningún dos de Galicia.

La Quinta honra a saga familiar de churreiros da que provén o seu promotor