A veciñanza de Xunqueira de Espadanedo únese para axudar unha familia
Iniciaron unha campaña solidaria para a familia que perdeu todo nun incendio, no lugar da Touza
Recompilan alimentos, roupa e calzado
Os tres bares da vila, a Oficina de Turismo e máis o museo de Niñodaguia son os puntos de recollida do material, que posteriormente trasladan ao ximnasio do antigo colexio para clasificalo. Os promotores da iniciativa, Cáritas, Concello e Protección Civil solicitan alimentos, produtos de hixiene, roupa e calzado. Tamén lles buscan unha nova vivenda de alugueiro na zona.
Sindy Caneiro, Cáritas de Xunqueira de Espadanedo: "O primeiro era vestimenta e alimento para estes días. De momento viven cuns familiares, pero a curto prazo. Buscarémoslles un alugueiro".
O lume, que se iniciou na noite do venres pasado, calcinou por completo a vivenda, situada no lugar da Touza, e mesmo afectou outras dúas lindeiras. Deixou sen nada un parella e a súa filla de catro anos. Tamén perderon as súas mascotas, como nos relataba a muller o día despois do incendio.
"Todo o material, pero queda a angustia, a tristeza, a dor pola miña cadeliña, a gata... dá moita tristura, nostalxia", contábanos Angie Vanesa Tonulada, a muller que vivía na casa que ardeu.
Naturais de Colombia, levaban un tempo vivindo aquí e o propósito da campaña solidaria é que o poidan seguir facendo.
Incendio en Vilavella
Tamén no concello da Mezquita están estudando a maneira de lle axudar a dona doutra vivenda que ardeu o sábado, horas despois do incendio de Xunqueira. Neste caso, a muller non estaba na casa, pero si os seus tres cans. Só un sobreviviu.
