Cinco membros dunha familia morren nun incendio provocado en Finlandia

As cinco persoas falecidas na madrugada deste martes no incendio intencionado dun edificio de vivendas na cidade finlandesa de Vantaa, ao norte de Helsinki, son un matrimonio de orixe somalí e os seus tres fillos de 3, 6, e 8 anos, informaron as autoridades do país nórdico en rolda de prensa.

Segundo a Policía, o incendio foi provocado por un finlandés de 70 anos que vive no mesmo edificio, quen se entregou ás autoridades e confesou ser o autor do sinistro.

O home está detido e aínda non foi interrogado, polo que se descoñecen, polo momento, os seus motivos, aínda que a Policía descartou que se trate dun crime racista.

Segundo os servizos de emerxencia, o sospeitoso provocou un intenso incendio no seu propio apartamento, situado xusto debaixo do das vítimas, e o fume estendeuse rapidamente pola escaleira do edificio.

Alarmados polo fume, o matrimonio e os seus fillos trataron de fuxir do seu apartamento, pero non o conseguiron e faleceron no corredor da escaleira pola inhalación dos gases tóxicos.

O único sobrevivente da familia foi un bebé recentemente nado, que foi atopado polos servizos de emerxencia xunto ao corpo dos seus pais e trasladado a un hospital.

Segundo explicou á prensa o xefe de bombeiros, é moi probable que as vítimas sobrevivisen se quedasen dentro do seu apartamento.

A Policía atribúe ao autor do sinistro cinco delitos de homicidio e un de incendio agravado, aínda que polo momento non cre que o seu obxectivo fose causar dano a esta familia ou a algún outro residente do edificio.

O incendio orixinouse pola madrugada nun edificio de vivendas sociais de seis plantas propiedade da cidade de Vantaa e os servizos de emerxencias recibiron a alerta ás 5:41 hora local (3:41 GMT).

Os bombeiros sufocaron o lume antes de que se estendese polas plantas superiores e evacuaron 57 veciños, catro dos cales necesitaron asistencia hospitalaria por inhalación de fume.