Hamas libera o soldado estadounidense Edan Alexander, retido en Gaza
A entrega do refén prodúcese como xesto cara aos Estados Unidos no marco das negociacións por un alto o fogo
Familias de reféns piden a Netanyahu un acordo esta noite: "A pelota está no teu tellado"
Hamas amosa disposición para negociar un acordo global que inclúa a retirada israelí e o intercambio de prisioneiros
Concentración en Tel Aviv pola liberación do refén Edan Alexander. Reuters. Ronen Zvulun
Xerusalén, 12 de maio de 2025. As brigadas de Al Qasam, brazo armado do grupo islamista Hamas, liberaron este martes na Franxa de Gaza o soldado estadounidense-israelí Edan Alexander, segundo informou a propia organización nun comunicado.
Hamas asegurou que a liberación se inscribe nos esforzos dos mediadores por acadar un alto o fogo, abrir os pasos fronteirizos e permitir a entrada de axuda humanitaria no enclave palestino. Sinalou tamén que, con "negociacións serias", sería posible liberar máis reféns, pero advertiu de que a continuidade da ofensiva israelí prolongará o seu sufrimento e podería causar mortes.
Entrega discreta e confirmación militar
Medios locais amosaron imaxes de vehículos da Cruz Vermella achegándose ao punto onde se recolleu a Alexander en Gaza. A entrega realizouse sen actos públicos nin difusión mediática, ao contrario que noutras ocasións anteriores.
O Exército israelí confirmou que a Cruz Vermella lles notificou a recepción dun refén e que os seus efectivos se desprazaron para recollelo na Franxa de Gaza.
Un xesto cara a Washington
A liberación de Alexander chega como xesto de Hamas cara aos Estados Unidos, un dos países mediadores entre Israel e o grupo islamista. Segundo a nota de Hamas, a organización mantivo contactos con autoridades estadounidenses nos que demostrou “positividade e gran flexibilidade”.
A operación coincide coa visita do enviado da Casa Branca para Oriente Medio, Steve Witkoff, que chegou este luns a Israel, e un día antes do inicio da xira do presidente Donald Trump por varios países da rexión.
Aspiración a un acordo amplo
Hamas manifestou a súa vontade de iniciar de inmediato negociacións para alcanzar un acordo de alto o fogo sostible. A proposta inclúe a retirada do Exército israelí da Franxa de Gaza, a fin do bloqueo, o intercambio de prisioneiros e a reconstrución do territorio.
No seu comunicado, o grupo islamista instou a administración Trump a intensificar os seus esforzos para poñer fin ao que cualificou como “guerra brutal librada polo criminal de guerra Netanyahu contra nenos, mulleres e civís indefensos na Franxa de Gaza”.
Netanyahu di que aliberación foi posible grazas á "combinación gañadora" estadounidense-israelí
O primeiro ministro israelí, Benjamín Netanyahu, afirmou que a liberación do soldado estadounidense-israelí Edan Alexander foi posible grazas á “combinación gañadora” da presión militar de Israel e a presión política exercida polo presidente estadounidense, Donald Trump.
Nunha mensaxe difundida pola súa oficina, Netanyahu describiu a liberación como “un momento moi emocionante” e indicou que ese mesmo día falou con Trump. O presidente dos Estados Unidos expresoulle o seu compromiso con Israel e a vontade de manter unha “estreita cooperación” para alcanzar os obxectivos de guerra: liberar todos os reféns e derrotar a Hamas.
As familias dos reféns secuestrados por HAMAS cualificaron este luns a liberación do soldado estadounidense-israelí Edan Alexander como “un raio de luz e esperanza”, pero tamén como un recordatorio de que aínda quedan 58 persoas cativas na Franxa de Gaza.
Alexander, militar israelí de 21 anos, foi entregado polas brigadas de Al Qasam —o brazo armado de HAMAS— ao Comité Internacional da Cruz Vermella (CICV), que o transferiu despois ao Exército israelí dentro do enclave palestino.
O Exército confirmou que Alexander xa se atopa en territorio israelí, onde pasará unha avaliación médica inicial antes de reunirse coa súa familia.
Esixencias dos familiares
As familias de reféns secuestrados polo grupo Hamas pediron ao primeiro ministro israelí, Benjamin Netanyahu, que anuncie esta mesma noite que está listo para negociar "un acordo integral" para a súa devolución e o fin da guerra en Gaza, xa que consideran que "a pelota está no seu tellado".
""Primeiro ministro Netanyahu, a pelota está no teu tellado. Anuncia esta noite que estás listo para negociar un acordo completo para traer a casa aos reféns e establecer un esquema para acabar coa guerra", esixiu o Foro de Familias de Reféns e Desaparecidos nun comunicado.
