Sánchez: "Ser europeísta e ser atlantista non implica un seguidismo cego"

O presidente do Goberno español Pedro Sánchez garantiu este xoves o pleno compromiso atlantista de España a pesar de rexeitar un gasto en defensa do 5 % do PIB e advertiu de que ese compromiso non implica o seguidismo cego que lamentou que algúns propoñen.

Sánchez fixo esa reflexión na conferencia de prensa posterior á reunión do Consello Europeo celebrado en Bruxelas ao día seguinte do cumio da OTAN que tivo lugar na Haia e tras o que o presidente dos Estados Unidos Donald Trump ameazou a España con facer pagar o dobre comercialmente pola súa negativa a incrementar o gasto militar.

O xefe do Executivo dixo que despois desa negativa chegou a poñerse en dúbida o compromiso transatlántico, mesmo tamén europeísta, do Goberno de España. "Pero ser europeísta e ser atlantista non implica un seguidismo cego que outros no noso país propoñen", sinalou antes de facer fincapé en que ser atlantista é cumprir coas obrigas coa OTAN pero tamén coa vacinación infantil en países en desenvolvemento, mandar tropas aos países do leste e non recortar as pensións.

Sánchez volveu lembrar ante as ameazas de Trump que as relacións comerciais son entre Bruxelas e Washington, e que é ese o contexto en que se están negociando os aranceis.

Ademais, asegurou que na reunión do Consello Europeo non houbo comentario ningún doutros líderes sobre a súa negativa a aumentar o gasto militar o 5 % do PIB ou sobre a influencia que iso poida ter no acordo comercial que a UE negocia cos Estados Unidos.

Aproveitou para mostrar a súa plena confianza nos negociadores europeos e expresar o seu desexo de que o que se consiga sexa positivo para ambas as partes.

O presidente do Goberno rebate críticas de Israel e insta a que cese o inferno a ceo aberto de Gaza

O presidente do Goberno rebateu este xoves as críticas de Israel polas súas declaracións sobre a situación en Gaza e instou os líderes dos Vinte e sete a manteren a presión sobre ese país para dicirlle "xa abonda" e que cese "o inferno a ceo aberto" na Franxa e Cisxordania.

O Consello Europeo de Bruxelas tomou nota do informe comunitario que apunta a que Israel podería estar a vulnerar as súas obrigacións cos dereitos humanos e instou a continuar os debates sobre iso en xullo.

O xefe do Executivo avanzara á súa chegada á reunión do Consello Europeo que ía pedir ao resto de líderes a suspensión inmediata do acordo de asociación da UE con Israel despois do informe do relator de dereitos humanos sobre a situación catastrófica de xenocidio que se está vivindo en Gaza.

"O que non ten ningún sentido é que levemos 18 paquetes de sancións a Rusia pola súa agresión a Ucraína e Europa, nun dobre estándar, e non sexamos capaces nin de suspender un acordo de asociación cando se está violando abertamente o artigo dous do respecto aos dereitos humanos", recalcou nesas declaracións da mañá.

Unhas declaracións que motivaron un comunicado da embaixada israelí en España en que cualifica de moralmente indefendible a petición de Sánchez á UE, asegurando que o coloca no lado equivocado da historia e reprochándolle que non condenase os ataques de Irán a Israel.

Tras ese comunicado, o Ministerio de Asuntos Exteriores español convocou o encargado de negocios da embaixada de Israel en Madrid por considerar inaceptable o texto da súa legación diplomática.

Sen referirse explicitamente ao comunicado israelí, o presidente do Goberno dixo que, en contra do que di o Goberno de Netanyahu, non é certo que non condenase os atentados de Hamas ou non esixise a liberación dos reféns. "Fixémolo desde o primeiro día, pero coa mesma determinación que lle esiximos a Hamas esta liberación e a condena a eses atentados terroristas, temos que dicirlle ao Goberno do primeiro ministro Netanyahu que xa basta", apostilou.