Sánchez responde ao enfado de Trump: "España é un país soberano"

O presidente do Goberno, Pedro Sánchez, esgrimiu este xoves que España é un "país soberano" e como tal decidiu que non elevará ao 5 % o gasto en defensa, aínda que está comprometido con cumprir cos seus compromisos coa OTAN, á vez que lle lembrou ao presidente estadounidense, Donald Trump, que é Bruxelas quen xestiona o comercio español.

"España un país solidario, comprometido cos Estados membros da Alianza, pero tamén soberano, e ese é o equilibrio que atopamos na declaración que acordamos os 32 Estados membros da Alianza Atlántica, incluído tamén os Estados Unidos", sostivo Sánchez á súa chegada ao Consello Europeo en Bruxelas.

Ao preguntarlle pola ameaza lanzada por Trump de que fará a España "pagar o dobre" ante a súa negativa a cumprir co obxectivo do 5% do gasto en defensa para 2035, o presidente lembrou que a política comercial a dirixe Bruxelas e a Comisión Europea está precisamente inmersa nunha negociación con Washington polos aranceis que xa impuxo os Estados Unidos.

"Europa e o mundo veñen sufrindo unha guerra comercial" como resultado das medidas tarifarias "inxustas e unilaterais" que no caso de España o son por partida dobre debido a que hai un "déficit comercial" e non un superávit cos Estados Unidos.

"Estamos nunha unión aduaneira, nun mercado único e a política comercial quen a negocia é Bruxelas en nome de todos os estados membros", insistiu o presidente, brindando o seu apoio á negociación en curso.

"España é un país aberto, amigo dos seus amigos, e consideramos os Estados Unidos un amigo de España", remarcou, incidindo en que non cre que o ocorrido na OTAN poida afectar a negociación comercial en curso entre Washington e Bruxelas, debido a que "son dous ámbitos distintos de debate".

Feijóo reprocha a Sánchez que asinase o 5 % coa OTAN pero queira gastar menos: "Tentou mentir a todos"

O líder nacional do PP, Alberto Núñez Feijóo, sinalou que o presidente do Goberno votou e asinou o acordo polo que os países membros da OTAN se comprometen a elevar o seu gasto en defensa ata o 5 % do PIB, aínda que posteriormente afirmase que só investirá o 2,1%. Ao seu xuízo mente para tranquilizar os seus socios e "manterse un tempo máis no poder", pero considera que "o pillaron".

Ao día seguinte do cumio da OTAN, nunha conferencia de prensa desde a sede do Partido Popular Europeo en Bruxelas, despois de manter unha reunión co resto de líderes conservadores do continente, Feijóo reprochou a Sánchez que asinase o acordo cos aliados e se desdiga "aos cinco minutos".

"Iso é incompatible con ser un país da OTAN ou un país da Unión Europea, eu creo que é incompatible con calquera tipo de relación internacional", indicou Feijóo, que cre que quedou en dúbida a imaxe de Sánchez. "Quen se fía xa do primeiro ministro español? Se é capaz de asinar un acordo e desdicilo aos cinco minutos na conferencia de prensa", indicou a continuación.

Para Feijóo o modo de actuar de Sánchez, "capaz de facer unha cousa e dicir a contraria", é un acto de "fariseísmo" impropio dun país como España.

Despois de que Sánchez lle lanzase un dardo ao afirmar que se Feijóo estivese no seu lugar, aceptaría chegar ao 5 %, o presidente do PP sinalou el levaría o plan ao Congreso dos Deputados, faría ben as contas, mantería os servizos públicos e, de ser necesario, pediría unha prórroga á OTAN. En calquera caso, asegurou que se asina un acordo, é para cumprilo.

Acordos do Consello Europeo

En Bruxelas falaron este xoves da guerra arancelaria. O 9 de xullo remata o prazo para negociar acordado con Washington. Os 27 son partidarios de evitar unha escalada, pero sobre todo España, para quen Trump quere un trato agravado. Sánchez lembroulle que "a política comercial quen a negocia é Bruxelas en nome de todos os Estados membros".

Non todos os membros da Unión o son tamén da OTAN, por iso, para manter o paso coa Alianza, o Consello Europeo acordou tamén o aumento das suas capacidades militares.

Falaron tamén do informe da alta representante sobre a posible vulneración por parte de Israel dos dereitos humanos en Gaza, pero só acordaron volver debatir o mes que vén: non saíu adiante a proposta española de suspender o acordo de asociaciación co país hebreo.