Trump ameaza España con represalias comerciais por non comprometerse co 5 % en defensa
O estadounidense considera inxusto que España non pague o mesmo que o resto de socios
Advertiu de que negociará un acordo que fará que España pague o dobre comercialmente para compensar a situación
O presidente dos Estados Unidos, Donald Trump, ameazou este mércores España con represalias comerciais por non comprometerse co gasto militar do 5 % do PIB no marco do cumio da OTAN na Haia.
Trump criticou a negativa de España de invertir o 5 % do PIB en defensa, tal e como acordaron os socios da OTAN. O estadounidense asegurou que negociará directamente con Madrid un acordo comercial e que fará que España pague o dobre comercialmente para compensar a situación.
"España é terrible, é o único país que non pagará ao completo", asegurou o mandatario estadounidense en conferencia de prensa no cumio da OTAN no que todos os aliados subscribiron elevar o gasto en Defensa ao 5%, pero no que España insiste na súa propia senda de gasto axustada a completar os obxectivos militares da OTAN.
Segundo Trump, a economía de España vai ben pero podería torcerse se "algo malo sucede". Avisou de que fará "pagar dobre" a España e o país "devolverá" con represalias comerciais a falta de investimento militar.
"Non vou permitilo. É inxusto", engadiu, tras reiterar que España "é o único país de todos os países que se nega a pagar" a súa parte no seo da OTAN. Para Trump a actitude de España responde a que queren aproveitarse do investimento do resto de aliados.
"Pero terán que devolvérnolo co comercio", remachou sobre a posición do presidente do Goberno, Pedro Sánchez. Así, avanzou que "negociará directamente" con España, aínda que insistiu en que "van pagar máis diñeiro desta maneira" recalcando que é a peaxe por non sumarse ao acordo xeral da OTAN.
"Imos negociar un acordo comercial con España. Imos facer que paguen o dobre. E dígoo en serio. Imos logralo", insistiu o mandatario republicano, a pesar de que Madrid negocia os seus acordos comerciais con Washington de maneira colectiva como membro da Unión Europea (UE).
As palabras de Trump fan pensar que o seu Goberno, que está a negociar con Bruxelas un novo pacto tras ameazar con aranceis de ata o 50 % para corrixir o que cualifica de déficits "inxustos", busque agora gravar partidas concretas de bens europeos que poidan afectar especialmente a España.
No cumio na Haia expúñase un único tema, definir a traxectoria de gasto para a próxima década, contexto no que os líderes aliados acordaron aumentar o investimento militar ata o 5% de aquí a 2035, seguindo o limiar que esixía Washington.
A pesar da declaración dos aliados, Sánchez insistiu en que España poderá seguir o seu propio roteiro de investimento. O documento final asinado polos líderes recolle o compromiso de chegar ao 5% no ano 2035, dedicando polo menos o 3,5% a investimento militar puro, co 1,5% en gasto relativo a seguridade, unhas métricas que España considera que non lle aplican.
Este choque público con España chega despois de días con Sánchez no foco da polémica polo seu rexeitamento para pactar o 5%.
O propio Trump desde o avión presidencial 'Air Force One' criticou antes de chegar a Países Baixos que España é un "problema" na OTAN pola súa falta de gasto en defensa. "España non está de acordo, isto é moi inxusto para o resto", argumentou sobre as reticencias de Sánchez de pactar o novo listón.
Xa na Haia, o secretario de Estado estadounidense, Marco Rubio, redobrou os ataques a España asegurando que a súa posición supón un "problema" para a OTAN, postura que atribuíu a "problemas internos" de Sánchez. "Teñen un goberno de centro-esquerda que basicamente quere gastar moi pouco ou nada no Exército", asegurou o xefe da diplomacia estadounidense en declaracións a Politico.
