Trump avanza que Israel aceptaría un cesamento do fogo en Gaza de 60 días

O presidente dos Estados Unidos Donald Trump anunciou este martes que Israel aceptaría unha proposta de cesamento do fogo de 60 días na Franxa de Gaza e expresou a súa esperanza de que Hamas tamén acepte o acordo.

"Israel acordou as condicións necesarias para alcanzar o cesamento do fogo de 60 días, durante o cal traballaremos con todas as partes para poñer fin á guerra", detallou o mandatario republicano na plataforma Truth Social.

Segundo Trump, os mediadores qatarís e exipcios, que, segundo dixo, traballaron arreo para lograr a paz, presentarán a Hamas esta proposta final.

"Espero, polo ben de Oriente Medio, que Hamas acepte este acordo, porque outramente a situación non mellorará, senón que empeorará", apuntou.

A nova proposta de acordo para unha tregua e a liberación de reféns en Gaza chega a poucos días de que Trump reciba o vindeiro luns na Casa Branca o primeiro ministro israelí Benjamin Netanyahu. O presidente estadounidense quere aproveitar o impulso obtido coa tregua na guerra entre Israel e Irán para lograr tamén un acordo en Gaza.

Segundo a prensa estadounidense, a proposta incluiría un cesamento dos ataques israelís na Franxa de Gaza durante 60 días a cambio de que Hamas libere dez reféns con vida e entregue os corpos doutros quince. Durante ese período, ambas as partes negociarían unha posible fin definitiva do conflito, aínda que as posicións de Israel e Hamas seguen sendo profundamente opostas.

Para o Goberno de Netanyahu, a fin da guerra debe implicar a eliminación de Hamas do poder e o desmantelamento do seu brazo militar, mentres que o grupo islamista palestino esixe o retiro total das tropas israelís do enclave.

Desde o 7 de outubro de 2023, tras os atentados de Hamas que mataron a 1.200 persoas en Israel, máis de 56.000 palestinos morreron e máis de 132.000 foron feridos pola ofensiva israelí sobre Gaza.