Guindan laranxas contra os coches en Ourense

Esmagadas contra o asfalto polo tránsito constante de vehículos nesta arteria da cidade, aínda vemos algún resto de laranxa na Habana.

"Pasoume a min, na Habana, nesa esquina, ía no coche e tiráronme unha laranxa. Asustámonos moito, porque pensei que lle dera a algún canciño, pero non, era unha laranxa", explica unha afectada que non denunciou porque non tivo danos no vehículo.

As nosas preguntas xeran expectación na zona. A propia froiteira, que ten o negocio a poucos metros do lugar, non oculta o seu asombro:

"Claro, porque é unha froita cara, e ademais pode facerlle dano a un vehículo ou a un cidadán. A máis barata está a 0,99 e a máis cara a 2,50. Hai de mesa, de zume... hai variedade".

A zona onde ten pasado isto é na intersección de dúas céntricas rúas: Cardenal Quevedo e a concorrida avenida da Habana. Un cruzamento rodeado de edificios de vivendas de ata sete e oito pisos de altura. Difícil concretar a procedencia das laranxas.

Os casos denunciados aconteceron de madrugada, nas horas de menos tránsito e sen testemuñas na rúa.