Galicia viviu o verán máis seco en 44 anos e o máis cálido desde que hai rexistros

Galicia rexistrou este ano o verán climatolóxico (xuño, xullo e agosto) máis cálido da serie histórica, iniciada en 1961, cunha temperatura media de 21,1 graos, dous máis do habitual neste período, segundo o informe elaborado por Meteogalicia.

Tomando como referencia a media das temperaturas mínima e máxima, cuxas anomalías foron 2,3 graos e 1,7 graos por encima do previsto, respectivamente, este período considérase extremadamente cálido.

En concreto, o mes de xuño foi o máis cálido desde 1961, cunha temperatura media de 20,5 graos, ata 2,8 graos máis do normal.

No caso da temperatura mínima, cunha desviación positiva de 2,6 graos, foi tamén o máis cálido da serie histórica, mentres que tendo en conta a media da temperatura máxima, 3 graos superior ao habitual, foi o segundo máis cálido rexistrado ata o momento. Estes valores fan que este mes se considere extremadamente cálido.

Pola súa banda, xullo e agosto foron meses moi cálidos: en xullo, a temperatura media foi de 20,9 graos, 1,3 graos máis que a marca habitual. As medias das temperaturas mínima e máxima foron de 1,2 graos e 1,3 graos, respectivamente.

En canto ao mes de agosto, foi o segundo máis cálido da serie histórica e ten como característica destacada o longo episodio de calor entre os días 2 e 17, de modo que a temperatura media alcanzou os 21,8 graos, 1,9 graos superior ao normal.

En canto ás medidas das temperaturas mínima e máxima, os rexistros foron tamén moi cálidos, con desviacións positivas de 1,3 graos e 2,5 graos, respectivamente.

En canto ás choivas, Galicia rexistrou un verán climatolóxico moi seco cunha precipitación media acumulada entre as 16 estacións máis representativas de 51 litros por metro cadrado, un 62 % inferior ao valor habitual no período de referencia 1981-2010.

De feito, para atopar un verán máis seco hai que remontarse ao ano 1981.

O mes de xuño foi moi seco, cunha precipitación media acumulada de 18 l/m², un 68 % por baixo do normal; xullo e agosto foron secos con 15 l/m², un 55 % inferior ao habitual, e 18 l /m², un 58 % por baixo do dato normal, respectivamente.