Ferido un parapentista ao sufrir un accidente en Porto do Son
Caeu nunha leira no lugar de Cans e tivo que ser trasladado en helicóptero a un centro hospitalario
Un momento do rescate. FOTO/Consorcio contra incendios e Salvamento da Coruña
Un parapentista quedou ferido este domingo ao caer nunha leira no lugar de Cans, no concello de Porto do Son. En concreto, sufriu o accidente nunha zona aberta e próxima ao quilómetro 83 da AC-550.
Segundo informou o 112 Galicia, recibiron un aviso ao redor das 15:00 horas no que se alertaba dun accidente de parapente tras o cal o deportista dicía non sentir as pernas.
Deste xeito, mobilizouse unha ambulancia medicalizada pero, debido ás lesións, o accidentado foi evacuado en helicóptero con prognóstico reservado para recibir atención médica nun centro hospitalario.
Ata o lugar dos feitos tamén acudiu unha dotación do parque de bombeiros de Ribeira, integrantes do grupo de emerxencias e salvamento (GES) de Noia e unha patrulla da Garda Civil, ademais dos servizos sanitarios do 061.
