Feridas tres persoas nun accidente na autovía que une Verín con Portugal
A furgoneta na que viaxaban envorcou á altura da parroquia de Tamaguelos
A Policía Local fíxose cargo de dous gatos, dous cans e un paxaro que ían no vehículo
A furgoneta na que viaxaban tres persoas e cinco animais
Tres persoas quedaron feridas nun accidente ocorrido este sábado na autovía que une Verín coa fronteira portuguesa. Dúas delas tiveron que ser excarceradas.
Por razóns aínda sen determinar, a furgoneta na que viaxaban pola A-75 foise da vía ao seu paso pola parroquia de Tamaguelos e envorcou na beiravía.
A condutora, de nacionalidade lusa, saíu polo seu propio pé, pero o resto de ocupantes quedou atrapado no interior. Pola falla de efectivos no parque de Verín, os bombeiros de Xinzo e do Carballiño tiveron que reforzar o operativo.
O persoal do 061 encargouse do traslado ao hospital das tres persoas feridas, unha delas cun forte golpe na cabeza. Ademais, prestaron asistencia axentes da Garda Civil e membros do GES de Laza.
No vehículo tamén viaxaban dous gatos, dous cans e un paxaro. A Policía Local fíxose cargo dos animais.
