Unha farmacia de Noia faise viral con vídeos divulgativos nas redes sociais

Unha farmacia de Noia estase a facer viral con vídeos nas redes sociais. Fan divulgación científica sobre a saúde, dan consellos sanitarios, resolven dúbidas sobre medicamentos e todo cun toque de humor.

Claudia Leiceaga comezou con vídeos nas redes sociais hai uns cinco anos. Quere compartir o seu día a día na farmacia familiar, que teñen en Noia, e facer un labor de divulgación con certo humor e orixinalidade.

"Que se vende un venres pola noite nunha farmacia de garda? Comezamos ás doce da noite, pídennos sildenafil, para que nos entendamos é como viagra, comezamos forte a noite, pa ra disfunción eréctil, sempre con prescrición médica", di nun dos seus vídeos de Instragram.

Claudia ten xa moitos seguidores nas redes sociais e de todas as idades.

"Pouco a pouco fun facendo vídeos, vin que á xente lle gustaba. Pacereceume unha idea moi boa para chegar a máis xente e levar a farmacia fóra do mostrador", comenta a farmacéutica.

"Falamos de como usar correctamente un medicamento, a desmontar mitos e dar pautas para que non cometan ese erro", engade Claudia Leiceaga.

Fai divulgación sanitaria, trata temas de sáude, resolve dúbidas... e faino con vídeos didácticos dunha maneira amena e sinxela. 

"Sempre con honestidade, peo sempre cunha base científica", asevera.

Con case 200 mil seguidores en instagram, tamén participan nas redes sociais a súa irmá e seu pai, que se vixo viral.

Consciente da súa repercusión, insiste en ofrecer consellos profesionais, contido relacionado co autocoidado e precaucións con automedicarse.