Falece unha muller de 95 anos en Lugo ao caer desde un quinto andar cando limpaba os cristais

Unha muller de 95 anos faleceu este mércores a primeira hora da tarde en Lugo ao precipitarse desde un quinto andar. Segundo os primeiros indicios ocorreu cando trataba de limpar unha xanela da súa vivenda, segundo informaron fontes policiais.

O suceso produciuse dez minutos antes das dúas da tarde. A esa hora recibiu o Centro Integrado de Atención ás Emerxencias de Galicia (CIAE) a primeira chamada para avisar de que unha muller caera desde o edificio.

Sucedeu na avenida Marqués de Ombreiro, onde a confluencia coa rolda do Carme forma unha pequena praza, no barrio da Fonte dos Ranchos. O 112 mobilizou decontado os servizos de urxencias sanitarias, así como á Policía Local e maila Nacional.

Os sanitarios só puideron certificar o falecemento da vítima. A policía acordoou a zona e os axentes realizaron as correspondentes investigacións para determinar as causas do suceso.