Extinguido despois de oito horas o incendio da comisaría da Policía Nacional de Santiago

O incendio rexistrado na comisaría da Policía Nacional de Santiago quedou extinguido tras máis de oito horas de traballo dun operativo integrado por 21 bombeiros.

As instalacións da avenida de Rodrigo de Padrón permanecerán desaloxadas polo menos o resto da xornada, á espera dunha ventilación completa e dunha avaliación dos danos.

O lume orixinouse nunha zona de tiro situada nunha das plantas inferiores, nun espazo onde había pneumáticos almacenados.

O suceso non causou danos persoais, pero provocou unha intensa nube de fume que se estendeu por distintos puntos da cidade.

A consecuencia do fume, foron evacuados tamén o IES Rosalía de Castro, que suspendeu as clases, e a reitoría da Universidade de Santiago de Compostela.

Estes desaloxos producíronse despois do da propia comisaría, que se levou a cabo de maneira controlada arredor das 10.00 horas, nada máis detectarse o incendio.

O operativo obrigou a mobilizar persoal que estaba de libranza. Aos 13 bombeiros iniciais sumáronse máis efectivos ata completar 21, ademais de tres do parque.

Durante a intervención tiveron que facer quendas no interior do edificio polas dificultades derivadas da acumulación de fume, cualificado como tóxico.

Segundo explicou o delegado do Goberno en Galicia, o incendio produciuse nunha das galerías de tiro da comisaría e podería deberse a un curtocircuíto.

Arredor das 11.30 horas  cortouse tamén a praza onde se sitúa o inmoble, no casco histórico.

Polo momento só constan danos materiais, principalmente na planta baixa.

As persoas con cita na oficina de expedición do DNI e na oficina de Estranxeiría tiveron que abandonar o edificio e deberán agardar a nova información sobre a reanudación do servizo.