Estafas na compravenda de vehículos estarían detrás do crime do pozo do Porriño

A Garda Civil concluíu que o motivo do homicidio do pozo do Porriño podería estar relacionado con estafas que supostamente a vítima realizaba no sector da compravenda de vehículos.

Así o sinalou a Benemérita nun comunicado logo das actuacións practicadas para tratar de esclarecer os feitos, despois de que en febreiro de 2021 aparecese o corpo sen vida dun cidadán portugués nun pozo da localidade.

Tras identificar a vítima o pasado mes de abril, a investigación, tutelada polo Xulgado de Instrución número 3 do Porriño, conseguiu reconstruír os últimos movementos coñecidos realizados polo falecido.  

Así se determinou que desaparecera o día 13 de outubro de 2018 en Vigo. Despois identificouse aos supostos autores materiais do suceso, polo que a semana pasado cinco persoas foron detidas.

Delas, dúas foron postas en liberdade xa en sede policial e tres pasaron a disposición xudicial, decretándose o ingreso en prisión de dous homes e quedando un terceiro en liberdade, os tres investigados polos delitos de homicidio e detención ilegal.

O corpo foi atopado por un empregado dunha empresa de limpeza, que ía realizar uns traballos nunha nave, en febreiro do ano pasado. O cadáver estaba moi deteriorado e, xunto a el, que tiña sinais de violencia, atopáronse tamén as chaves dun vehículo antigo marca Renault e unha chave convencional, así como moedas acuñadas en Portugal.

Os métodos de estudo xenético non permitiron a identificación do home, polo que se recorreu a esas técnicas de antropoloxía forense. Os expertos concluíron que o falecemento se produciu entre 2017 e 2020, e que o corpo pertencía a un home de entre 30 e 40 anos, de 1,75 metros aproximadamente de estatura, e de complexión forte.

A identificación do corpo foi posible grazas á difusión dun retrato robot, que foi visto pola nai do falecido, recoñecemento que podería tratarse do seu fillo. Finalmente, tras realizar probas de ADN, o resultado foi positivo.