España xogará a final do Europeo de baloncesto
Sorprendeu a Alemaña na súa casa e, contra todo prognóstico, enfrontarase á selección francesa á procura do título
Ninguén daba un euro pola selección española para este Eurobásket. As enquisas previas dábana, como moito, como un equipo que podía chegar aos cuartos de final. Multitude de baixas e xogadores históricos que deixaron o equipo era unha combinación demasiado pesada como parar soñar cun éxito.
Pero o equipo de Scariolo deulle a volta a todo prognóstico e sorprendeu a Alemaña na súa casa (96-91) para meterse na final. E iso que houbo momentos críticos como un parcial de 14-0 a prol dos alemán ao final do segundo cuarto grazas ao que se foron con vantaxe no descanso (46-51).
Ou o intre do terceiro cuarto no que se puxeron dez abaixo (61-71) co público emborcado. No cuarto decisivo chegou o momento de España que, cun 13-0 collía o mando do partido (83-77) e xa non o soltaría.
Outra vez Brown (29 puntos) e Willy Hernangómez (16) foron os máis destacados dunha selección que, máis ca nunca, é un equipo.
