En Medicina Preventiva aconsellan informarse dos riscos de saúde antes de contratar unha viaxe

A vacina contra a febre amarela é aconsellable para visitar moitos países exóticos e mesmo obrigatoria nalgúns deles. Pero hai viaxeiros, que por idade ou condición, teñen contraindicado poñela.

Por casos coma este, en medicina preventiva, recordan que antes de viaxar o primeiro é informarse.

"Hai que saber os riscos do sitio onde vas antes de contratar unha viaxe porque se despois te tes que vacinar de algo do que non podes, te ves ante o dilema de vacínome ou non vou", subliña a especialista en medicina preventiva Ángeles Bouzas.

Convén tamén pedir cita en Sanidade Exterior ou nas unidades de medicina preventiva con bastante antelación á viaxe.

"Se pode ser con tres meses de antelación ou máis é o ideal porque hai vacinas cunhas pautas que requiren uns tempos que non se poden cumprir se acodes tarde", explica Ángeles Bouzas.

Xa en destino os consellos básicos son coidar o que se bebe e o que se come e protexerse contra as picaduras de mosquitos, que poden transmitirnos enfermidades graves.

Fronte ás voces que falan da maior eficacia dos repelentes comprados in situ, a doutora Ángeles Bouzas recomenda levalos das nas nosas farmacias.

"Paréceme un pouco arriscado utilizar produtos químicos que non sabemos se poden ser tóxicos ou non", argumenta a especialista.

Á volta da viaxe, ante calquera problema de saúde, a especialista aconsella comunicar que se estivo fóra e onde, independentemente do tempo transcorrido.

"Non hai moito houbo un caso de rabia nun viaxeiro que estivera dez meses antes nunha zona de risco", exemplifica a doutora Bouzas.