Vigo mergúllase nun Nadal sen fin co acendido das súas luces
Milleiros de turistas quixeron vivir en directo o espectáculo na porta do Sol
Doce millóns de lámpadas escintilan en cincocentas prazas e rúas
A cidade agarda recibir ata xaneiro máis de seis millóns de persoas
A tradicional conta atrás na porta do Sol inaugurou o agardado acendido das luces do Nadal de Vigo, un acontecemento marcado nas axendas de milleiros de turistas que este sábado quixeron vivir o momento en directo.
O alcalde, Abel Caballero, premeu o botón que vai converter a cidade no destino de máis de seis millóns de persoas nas vindeiras semanas. O colapso e a diversión van convivir durante dous meses nunha urbe que xa converteu estas festas no seu sinal de identidade.
"Acaba de arrancar o Nadal do planeta. Viva Vigo!", proclamou o rexedor tras contar do cero a dez en inglés, castelán e galego.
Doce millóns de lámpadas
Doce millóns de lámpadas LED escintilan xa en cincocentas rúas e prazas que locen arcos brillantes e motivos ornamentais.
Unha enorme nora, un bosque refulxente e unha árbore xigante coroan este parque temático urbano que se completa cun intenso programa de animación na rúa.
Dende primeira hora da tarde, tentar entrar en Vigo, sobre todo a través da AP-9, converteuse nunha odisea.
Os atoamentos nas principais vías de acceso dificultaron a circulación, pero non desaminaron a un público entregado que encheu o centro para gozar do espectáculo.
