Empezan a florear os crisantemos que encherán os camposantos para Defuntos
As plantas a mediados de outubro sairán dos viveiros para os puntos de venda
O prezo do testo para o público rolda os 10 euros
Nun par de semanas empezarán a venderse as flores para Defuntos, unhas flores que xa están medrando nos viveiros. Unha das clásicas é o crisantemo. Este ano poderían subir algo e custar sobre 10 euros.
Aínda falta un mes longo para Defuntos e nos viveiros están a punto de florecer as plantas que van engalanar os camposantos. Os viveiros énchense nestas datas de testos que se venderán como planta e non como flor cortada.
"Podíanse facer moitas máis se houbese máis espazo. Necesitan espazo todo ao redor para que sexan redondas, ben feitas, e non medren cara arriba. Ocupan moito espazo no viveiro", asegura Ofelia Vieites, dona de Viveiros Compostela.
Nun par de semanas, estarán listas para saír desde aquí aos puntos de venda: florerías e supermercados. Tamén nisto hai innovación, os clásicos brancos e amarelos deron paso a mesturas con rosas e fucsias.
"É moi práctico, é unha flor barata porque hoxe os ramos de flores son caros, teñen outra categoría como cousa especial, pero isto queda moi ben. Agora hai cores de todo tipo e aguantan moito, o dobre que un centro de flores", relata Ofelia
A metade da producción xa a teñen vendida. O resto, despacharana directamente ao público.
"Nós intentamos manter os prezos o xusto. Subiu todo, o substrato, os testos, a man de obra. Pero é unha planta relativamente barata, creo que se pode vender ao público sobre 10 euros incluso nalgúns sitios menos. É unha planta moi accesible", di.
Para os viveiros, a época máis forte é a da primavera coas plantacións dos xardíns. Agora no outono salvan a tempada coas flores para os Defuntos e o Nadal.
