Dúas persoas morreron esta fin de semana nas estradas galegas

Dúas persoas faleceron en accidentes de tráfico en Galicia na fin de semana. A última vítima foi un home de 81 anos que sufriu unha saída de vía co seu coche en Santa Comba pasadas as nove da noite do sábado.

O sinistro ocorreu na parroquia de Mallón. Unha persoa alertou os servizos de urxencias ao ver o coche accidentado a carón da estrada que vai de San Cristovo a Grixoa. No interior estaba o condutor, un home de 81 anos, aparentemente inconsciente.

Os servizos de rescate constataron que non estaba atrapado, pero os sanitarios só puideron confirmar a morte. A investigación determinará se o home, que ía só, puido sufrir algunha indisposición previa ao accidente, xa que non había marcas na estrada. 

A outra vítima da fin de semana foi un motorista de 40 anos que este sábado pola tarde caeu do seu vehículo na Terceira Rolda da Coruña, á altura da glorieta de acceso ao polígono de Pocomaco.

Foi una saída de vía pola marxe esquerda da estrada. O home faleceu no lugar como consecuencia do golpe sen que os servizos sanitarios puideran reanimalo.