O Goberno declara O Riós zona gravemente afectada tras o incendio que calcinou máis de 28 hectáreas

O Consello de Ministros declarou zonas gravemente afectadas por unha emerxencia de Protección Civil --o que se coñecía como zonas catastróficas-- a, entre outros, municipios afectados por 112 episodios adversos rexistrados en 14 comunidades autónomas entre o 27 de xullo e o 31 de agosto de 2026. Entre eles, atópase o municipio ourensán do Riós polo incendio forestal, da parroquia de Fumaces e A Trepa, que calcinou en agosto 28,21 hectáreas.

Así, as persoas e entidades que acrediten danos poden solicitar xa á Secretaría Xeral de Protección Civil e Emerxencias do Ministerio de Interior axudas para paliar danos privados; materiais en vivenda e aveños; gastos de corporacións locais; en establecementos industriais, mercantís e de servizos; e a persoas físicas ou xurídicas que realizasen prestacións privados e/ou de bens para a resposta á emerxencia.

Ademais, Interior estudará a posibilidade de aprobar unha exención das taxas do Organismo Autónomo Xefatura Central de Tráfico para os duplicados de permisos de circulación ou condución, así como baixas de vehículos sinistrados, e por expedición do DNI en caso de perda ou destrución.

O acordo adoptado habilita tamén medidas doutros ministerios. Por exemplo, o Ministerio de Facenda concretará a exención na cota do Imposto sobre Bens Inmobles e a redución na cota do Imposto sobre Actividades Económicas. Como é habitual, estarán exentas do Imposto sobre a Renda das Persoas Físicas as axudas por danos privados.

Pola súa banda, os de Traballo e Economía Social e de Inclusión, Seguridade Social e Migracións poderán desenvolver medidas como bonificacións e exencións de cotas de Seguridade Social. Así mesmo, o de Política Territorial e Memoria Democrática concederá axudas, por un importe de ata o 50%, aos proxectos que executen as entidades locais para reparar infraestruturas, instalacións e equipamentos municipais.

No ámbito das súas competencias, todos os departamentos ministeriais poderán declarar zona de actuación especial así como a emerxencia das obras para reparar os danos causados en infraestruturas de titularidade pública nos territorios amparados polo acordo adoptado.

Neste sentido, poderán ter a consideración de obras, servizos ou subministracións de emerxencia, os contratos de reparación ou mantemento de infraestruturas, equipamentos ou servizos, de obras de reposición de bens prexudicados e de avaliacións de danos, calquera que sexa a súa contía.