Italia prorroga outros 15 días, por segunda vez, os controis a viaxeiros procedentes de España

O Goberno de Italia anunciou este martes unha segunda prórroga, por outros 15 días de duración, aos controis en portos e aeroportos a viaxes procedentes de España, unha medida que comezou a aplicarse por mor da crise en Ceuta.

Esta nova suspensión do acordo Schengen, que permite a libre circulación en Europa, foi aplicada por primeira vez desde o 1 de agosto tras a crise migratoria na cidade autónoma española de Ceuta e prorrogada por 15 días máis desde o 31 dese mes.

Comunicado do Ministerio do Interior

Agora, o ministro do Interior italiano, Matteo Piantedosi, decidiu estender os controis outros 15 días despois de reunirse co Comité de Análise da Inmigración e a Seguridade nas Fronteiras, segundo lese nun comunicado do seu Ministerio.

"A medida considerouse necesaria tras as comprobacións realizadas polo Comité de Análise da Inmigración e a Seguridade das Fronteiras, que se reuniu esta mañá. De feito, seguen existindo elevados niveis de risco para a seguridade interna, alén dun posible perigo relacionado con eventuais infiltracións terroristas", alegou na nota.

Piantedosi xa comunicou esta prórroga á Comisión Europea e aos seus homólogos comunitarios.

O Goberno da ultradereitista Giorgia Meloni impuxo este tipo de controis por unha cuestión de "seguridade nacional" ante a crise en Ceuta.

Esa suspensión supuxo a reintroducción de controis fronteirizos en portos e aeroportos para viaxantes procedentes de España, que en calquera caso son aleatorios.

España prorroga ata o 8 de outubro os controis a viaxantes procedentes de Italia

O Goberno decidiu prorrogar ata outubro os controis en portos e aeroportos aos viaxeiros procedentes de Italia, tras a decisión deste país de dilatar a suspensión do acordo Schengen con España, segundo informaron fontes do Ministerio do Interior.

España comunicou á Unión Europea a decisión prorrogar durante quince días os controis fronteirizos naqueles aeroportos e portos que manteñen conexións directas entre o Reino de España e a República Italiana.

O Executivo considera que se manteñen as circunstancias que motivaron a adopción desta medida, polo que decidiu prolongala ata o próximo 8 de outubro, sen prexuízo de que un cambio das devanditas circunstancias poida aconsellar unha modificación do prazo previsto.

O pasado 31 de agosto, tras un mes desta medida, Italia asegurou que controlara a máis de 180.000 viaxantes procedentes de España nas súas fronteiras. Ademais rexeitou a entrada a 31 persoas, entre elas oito marroquís, e detivo outras seis.

Para Albares a decisión do Executivo de Meloni é "unha vergoña"

O ministro de Exteriores español, José Manuel Albares, cualificou de "vergoña" a decisión do Goberno de Giorgia Meloni de prorrogar os controis Schengen con España outros quince días e afeou que Italia recibe actualmente o dobre de entradas irregulares.

"É absurdo, é inútil e é unha vergoña porque é dinamitar o espírito, a filosofía do que quere dicir ser socios europeos", considerou Albares en declaracións aos medios no Senado, despois de que Roma decidise prorrogar os controis, medida á que o Goberno español respondeu en reciprocidade.

Na súa opinión, a primeira ministra Giorgia Meloni e o seu ministro de Exteriores, Antonio Tajani, non se están comportando como "líderes europeos á altura das circunstancias".

Italia ten "o dobre de entradas irregulares que España"

Albares resaltou que Italia ten actualmente "o dobre de entradas irregulares que España" e lembrou que en 2023, cando o Executivo italiano foi "incapaz" de xestionar a chegada de inmigrantes á illa de Lampedusa, "non soamente nós ofrecemos a nosa solidariedade, como o fixemos en moitas outras situacións, senón que mesmo acollemos migrantes irregulares traéndoos a España".

"Eu entendo que o Goberno italiano está a actuar por política interna, pero é vergoñoso e é desde logo un ataque directo á dignidade dos españois e á unidade e a solidariedade dos europeos", insistiu, recalcando que "Europa sen solidariedade non pode existir".

O homólogo italiano de Exteriores considera agresiva a reacción de Albares 

Tajani considerou a declaración do seu homólogo español como "innecesariamente agresiva" nunha mensaxe nas súas redes sociais no que asegurou o seu país "aplica as normas e os Tratados europeos co único obxectivo de defender a seguridade das fronteiras e dos seus cidadáns".

"A reacción do Gobierno español ante a decisión italiana de manter a suspensión de Schengen resulta, por tanto, fóra de lugar, inapropiada e innecesariamente agresiva", agregou o ministro de Exteriores italiano.