A Xunta esixe por carta á ministra de Igualdade datos sobre os fallos das pulseiras antimaltrato
Ángeles Vázquez quéixase de falta de información ás comunidades e acusa o ministerio de saber que as pulseiras tiñan erros
A conselleira de Política Social e Igualdade, Ángeles Vázquez, remitiulle unha carta á ministra de Igualdade, Ana Redondo, na que lle esixe que traslade de forma inmediata á Xunta información sobre as incidencias rexistradas en Galicia no Sistema Cometa e nas pulseiras antimaltrato.
Na misiva, difundida este xoves aos medios, a conselleira lembra que o Goberno galego xa solicitou con anterioridade ao departamento estatal información sobre o alcance dos fallos detectados para garantir o correcto funcionamento do sistema.
"Como conselleira de Política Social e Igualdade, fago miña esa esixencia e reclámolle respostas claras e garantías suficientes sobre a seguridade das mulleres que dependen destes dispositivos", indica Ángeles Vázquez.
Vázquez sostén que as últimas informacións fan "esta esixencia aínda máis urxente", ao censurar que aos fallos coñecidos no sistema se suman as actuacións da Fiscalía Europea nunha investigación sobre unha posible fraude relacionada con fondos comunitarios destinados a estes dispositivos, así como "as deficiencias" advertidas polo Tribunal de Contas en aspectos relacionados coa contratación, a transición entre adxudicatarios e a supervisión do servizo.
Quéixase de falta de información ás comunidades
Ángeles Vázquez denuncia a suposta falta de información trasladada ás comunidades autónomas e que "non é admisible que unha administración responsable da atención e acompañamento ás vítimas teña que coñecer a través de informacións públicas problemas que poden afectar directamente á súa protección".
"A coordinación institucional esixe información inmediata, transparencia e capacidade de resposta", indica para sinalar que en Galicia "existen, ademais, circunstancias territoriais que requiren especial atención" e que "os problemas de cobertura que poden producirse en pequenos núcleos de poboación, no medio rural ou en zonas fronteirizas con Portugal fan necesario garantir que estes dispositivos ofrezan o mesmo nivel de protección con independencia do lugar no que resida unha muller".
Por todo iso, reclama que traslade de forma inmediata á Xunta de Galicia información completa e actualizada sobre as incidencias rexistradas na comunidade, o número de mulleres afectadas ou potencialmente afectadas, os problemas de cobertura e xeolocalización detectados e as medidas adoptadas para corrixilos.