Dous goles psicolóxicos acaban coa resistencia do Hóckey Coruña na Copa da Raíña
Perdeu diante do Palau (2-0) que marcou na última xogada do primeiro tempo e na primeira acción do segundo
Rematou a temporada para o Hóckey Club Coruña coa derrota nos cuartos de final da Copa da Raíña diante do Palau (2-0). Un partido no que entrou moi ben con dúas ocasións claras pero as paradas de Laura Vicente mantiveron o equipo catalán no partido. Co paso dos minutos o Palau foi levando a iniciativa e tivo o acerto de marcar o primeiro gol a corenta segundos do descanso cunha manobra da súa estrela Aina Florenza.
A desgraza para o Coruña foi grande porque na primeira xogada do segundo tempo Mariona Colomer marcaba o definitivo 2-0 e poñía unha diferenza que foi insalvable. O equipo galego buscou o gol que os metese na eliminatoria pero o traballo defensivo do Palau resultou perfecto.
Acaba unha temporada coa que o Hóckey Coruña inicia un cambio de ciclo porque dez xogadoras anunciaron que non ían continuar para a vindeira temporada.
