Dous galegos son os comisarios do proxecto español da Bienal de Arquitectura de Venecia

A Bienal de Arquitectura de Venecia inaugurouse este sábado, 10 de maio, e vaise celebrar ata o 23 de novembro. Dous galegos son os comisarios do proxecto español na Bienal.  Son o coruñés Roi Salgueiro e o pontevedrés Manuel Bouzas, quen en febreiro gañou o Premio Princesa de Xirona de Artes.  

O pavillón español abriu este sábado as súas portas para amosar a súa aposta polas construcións ecosostibles a través da descarbonización. Internalities é a palabra que encabeza o pavillón español, é o nome do proxecto. Para esta exposición, os dous arquitectos galegos reestruturaron a nave dos xardíns públicos de Venecia; 500 metros cadrados divididos nun espazo central e dúas salas laterais anexas.

Segundo explicaron Bouzas e Salgueiro Internalities, as internalidades, refírense "ás arquitecturas que reverten as externalidades medioambientais", é dicir, as arquitecturas que reparan o dano medioambiental que xa está feito.

A nave central de Internalities expón dezaseis casos concretos. Son proxectos recentes dos dous arquitectos galegos realizados en España e tamén no estranxeiro. Son proxectos nos que as arquitecturas reparan a través do uso dos materiais como, por exemplo, da madeira nun realizado en Xirona; da pedra seca nun realizado en Almería e do formigón nun realizado en Palma de Mallorca.

O obxectivo destes arquitectos é traballar "cos recursos que proporciona o propio territorio e construír arquitectura de peso, con bóvedas e pilastras, que reduzan as emisións causados polos materiais importados", explican.

As naves laterais, nas que se expón o proxecto español, amosan cinco traballos de investigación creados arredor das palabras "materiais", "oficios", "residuos" e "emisións".

O estudo sobre materiais é sobre unha investigación da madeireira na cornixa Cantábrica. O traballo sobre emisións e residuos vai seguir o rastro de CO2 dunha infraestrutura das Illas Baleares desde a súa construción ata a súa demolición,  e o que se ocupa dos oficios explica como as industrias de proximidade da zona mediterránea logran ser competitivas.