Dous detidos por ter animais mortos e outros en mal estado en Abegondo
Atopáronse os corpos de cinco de animais de produción en avanzado estado de descomposición e outros cinco animais vivos nunhas deplorables condicións hixiénico-sanitarias
O Servizo de Protección da Natureza (SEPRONA) da Garda Civil de Corcubión detivo dúas persoas como supostas autoras dun delito de malos tratos animais, outro de abandono de animais e un terceiro contra a saúde pública.
A Garda Civil informou este martes de que as detencións se produciron tras ter coñecemento da posible existencia de animais abandonados nun inmoble da parroquia de Crendes, no termo municipal de Abegondo.
No lugar, os axentes inspeccionaron a zona e comprobaron que do interior do baixo do inmoble emanaba un forte cheiro a putrefacción, posiblemente orixinado por algún animal en estado de descomposición.
Ante este achado, a Garda Civil solicitou á Autoridade Xudicial un permiso para entrar. Así, dentro acháronse os corpos de cinco de animais de produción en avanzado estado de descomposición e outros cinco animais vivos nunhas deplorables condicións hixiénico-sanitarias.
A Garda Civil puxo os feitos en coñecemento da Consellería do Medio Rural da Xunta de Galicia, a cal procedeu á retirada dos animais mortos mediante unha empresa coas autorizacións pertinentes para ese labor e á custodia dos espécimes vivos.
Activouse entón un procedemento de localización dos presuntos responsables dos feitos e procedeuse á detención dun home e unha muller como supostos autores dun delito de malos tratos animais, outro de abandono animal e un terceiro contra a saúde pública.
