Un incendio forestal queima ao redor de vinte hectáreas en Ourol
O lume afecta á parroquia do Sisto e para a súa extinción mobilizáronse varios medios terrestres pero non aéreos
Imaxe de arquivo. TVG
Un incendio forestal iniciado pasadas as once da noite do venres queimou ata o momento ao redor de vinte hectáreas no concello lucense de Ourol, segundo informa a Consellería do Medio Rural.
O lume afecta á parroquia do Sisto neste municipio da Mariña de Lugo e para a súa extinción mobilizáronse, de acordo co reporte do Goberno galego, un técnico, oito axentes, dez brigadas, dez motobombas e unha pa; sen intervención de medios aéreos.
ACTIVO un incendio no concello lucense de Ourol, parroquia do Sisto, que segundo as últimas estimacións provisionais rolda as 20 hectáreas #IFOSistoOurol
— incendios 085 (@incendios085) March 28, 2026
Desde a Consellería do Medio Rural lembran que se habilitou o teléfono gratuíto 085 para avisar en caso de detectar un incendio forestal e que existe outro número anónimo e gratuíto para denunciar os delitos relacionados con incendios dos que se teña constancia ou coñecemento.
