Dous coches estámpanse contra senllas casas en Ames e Ponteceso

Os propietarios da vivenda situada na aldea de Guimaráns en Ames aínda non dan creto ao susto que viviron onte cando un coche saíu da vía, levou por diante o muro que pecha a sua finca e acabou estampado contra a casa. Da violencia do impacto dan fe os restos do muro esparexidos polo patio da vivenda, á espera de que os peritos avalíen os danos.

Ata o lugar do accidente desprazáronse Protección Civil de Ames, o GES de Brión, efectivos da Policía Local e da Garda Civil. Daniel Recioy, bombeiro do GES de Brión, asegura que non tiveron que intervir porque a condutora saíu polo seu pé.

A condutora era unha muller nova que deu positivo no control de alcolemia. Viaxaba coa sua filla de curta idade no asento traseiro, que foi trasladada por prevención a un centro médico. 

O accidente xerou moita expectación porque moi preto celebraban unha festa gastronómica. Algunhas testemuñas aseguran que o coche circulaba a velocidade excesiva e que o sinistro puido ter consecuencias fatais.

Outro accidente similar producíuse no coñecido como cruzamento da Campara en Ponteceso. Un coche bateu contra unha casa e abriu un enorme furado na parede. Por sorte, os propietarios durmían no segundo andar. Os catro mozos que viaxaban no veículo quedaron feridos, dous deles en estado grave.