Dimite o número dous da Policía Nacional tras unha denuncia por agresión sexual

O director adxunto operativo (DAO) da Policíada Policía Nacional, José Ángel González, dimitiu na noite deste martes tras coñecerse esta mesma tarde que un xulgado de Madrid o citou  en calidade de querelado, o vindeiro 17 de marzo, por un delito de agresión sexual contra unha suboordinada.

Nun auto datado o 12 de febreiro, ao que tivo acceso EFE este martes, o xulgado de violencia sobre a muller número 8 de Madrid empraza tamén ese día á muller para escoitar o seu relato. Faino despois de incoar dilixencias previas e admitir a trámite a querela nunha resolución na que o maxistrado afirma que os feitos "presentan características que fan presumir a posible existencia dun delito de agresión sexual cuxa instrución corresponde a este órgano xudicial".

A axente di que foi coaccionada para non denunciar os feitos  

O avogado da axente que presentou a denuncia, Jorge Piedrafita, pediu tamén que se investigue a José Ángel González, polos presuntos delitos de coaccións, lesións psíquicas e malversación. A muller afirma que o exdirector adxunto operativo (DAO) da Policía, con quen mantivo no pasado unha "relación de afectividade", agrediuna sexualmente nunha vivenda oficial, propiedade do Ministerio do Interior, á que foi presionada a acudir en abril do ano pasado e estando de servizo, e despois foi coaccionada para que non denunciase os feitos.

A querela, que inclúe unha gravación de audio, subliña as "negativas inequívocas, claras e persistentes" da axente, alude á "violencia física" e á "intimidación ambiental", e denuncia a "situación de illamento, superioridade física e autoridade ambiental".