Detido un home en Ourense por roubar unha muller na rúa e provocarlle lesións leves

A Policía Nacional detivo un individuo como presunto autor dun delito de roubo con violencia ocorrido nunha rúa do barrio do Vinteún, onde, segundo os axentes, arrebatou a unha muller as cadeas que levaba no pescozo e provocoulle lesións leves. Tras pasar á disposición xudicial, o arrestado ingresou en prisión.

Cando ocorreron os feitos, a muller atopábase camiñando pola vía pública. En base ao comunicado da Policía Nacional, nun momento no que se parou na beirarrúa, un individuo achegóuselle por detrás de xeito sorpresivo, "agarrándoa fortemente polo pescozo" para quitarlle "de forma violenta" as xoias que levaba.

"Ante os feitos, a vítima comezou a gritar e pedir axuda, sendo auxiliada por varios viandantes que ademais retiveron ao presunto autor ata a chegada da dotación policial, que procedeu á súa detención", explican os axentes. Estes acharon oculta entre a súa roupa unha das cadeas subtraídas á vítima.

Tras a tramitación das dilixencias policiais por un presunto delito de roubo con violencia, o detido foi posto á disposición da Sección de Instrución do Tribunal de Instancia en funcións de garda, que decretou o seu ingreso en prisión.