O alcalde socialista de Ames pide a Óscar Puente que asuma responsabilidades e dimita
"Dúas traxedias ferroviarias, 115 persoas falecidas e centos de vítimas reclaman algo máis que palabras", asegura o rexedor
Para Blas García "é o momento de dar exemplo"
O alcalde de Ames, Blas García. Concello de Ames
O alcalde socialista do municipio coruñés de Ames, Blas García, pediu este venres ao ministro de Transportes e Movilidad Sostenible, Óscar Puente, que asuma responsabilidades e presente a súa dimisión tras o accidente ferroviario de Urda (Toledo).
Nunha mensaxe publicada nas súas redes sociais, García aludiu ás palabras do presidente do Goberno, Pedro Sánchez, sobre que "non é asumible para España sufrir dous accidentes nun mesmo ano".
"Dúas traxedias ferroviarias, 115 persoas falecidas, polo momento, e centos de vítimas reclaman algo máis que palabras", sinalou o rexedor, que defendeu que "non se trata" de buscar "un cabeza de turco nin de alimentar a confrontación política", senón de "asumir responsabilidades".
Así mesmo, apuntou que Puente é o máximo responsable político das infraestruturas ferroviarias do Estado e considerou que, "por ética, coherencia e respecto ás vítimas", debería "dar un paso ao lado e presentar a súa dimisión".
"A responsabilidade política non devolve vidas, pero si fortalece a confianza nas institucións e, sobre todo, dálle paz a unha sociedade polarizada e dividida", afirmou García, quen concluíu: "É o momento de dar exemplo".
