Seguen ingresados cinco dos feridos no Festival Medusa de Cullera

En Cullera, o concello decretou dous días de loito polo falecemento dun rapaz de 22 anos durante o Festival Medusa.

Un loito que se deixou sentir en Daimiel, Cidade Real, de onde era o falecido. As cinco persoas hospitalizadas de diferente gravidade continúan evolucionando. 

Mentres, a Generalitat valenciana recibiu máis de 500 chamadas no teléfono de atención a afectados que abriu tras o suceso. Unha boa parte dos presentes no festival Medusa pasaron a noite nun pavillón de Cullera habilitado para eles.

Os cinco mozos que quedaron ingresados en distintos hospitais tras resultar feridos na madrugada do sábado tras cederen varias estruturas do recinto do Medusa , permanecen neses centros. 

Unha moza de 19 anos ingresada no hospital de La Ribera ten a columna vertebral fracturada e vai ser intervida cirurxicamente. Outras dúas mozas de 19 e 20 anos seguen no Clínico con fractura de tibia unha e a segunda cunha probable fractura da pelve. Dos outros hospitalizados en Sagunto e Alacant non se facilitaron datos.

A Consellería de Sanidade sinala que tras o accidente atenderon 32 persoas en distintos hospitais de Valencia e de Alacant.