Día grande na Pobra do Caramiñal coa procesión das Mortallas

As festas do Nazareno na Pobra do Caramiñal inclúen unha das citas relixiosas máis peculiares de Galicia.

"Emocionante. Isto é precioso", conta unha das devotas.

A procesión das Mortallas saíu pouco antes do mediodía da igrexa de Santiago do Deán, seguindo unha tradición que mestura relixiosidade e lenda e que tería a súa orixe hai cinco séculos. 

"Sempre hai cousas polas que pedir e vir. E con ela vimos sempre". "Ofreceume miña nai e vimos todos os anos á misa e á procesión. E a amiga acoplouse comigo e estou moi orgullosa de vir con ela", explican dúas participantes na procesión.

As persoas "ofrecidas" percorren coa procesión as rúas da vila. Algunhas con hábito morado e descalzas. Outros devotos portan cadaleitos como agradecemento por ter superado algunha enfermidade e seguir con vida.

"A procesión é grande, pero vaise perdendo. Antigamente era moi grande, había moitísimas caixas, pero a xuventude non é coma a de antes", di unha veciña.

A procesión das mortallas ten a declaración de interese turístico de Galicia.