Detidos tres homes en Vigo tras tentar coarse nunha vivenda pola xanela
O morador viunos e, ademais de perseguilos pola rúa, chamou a Policía, a cuxos axentes facilitou unha descrición detallada dos presuntos ladróns
Axentes da Policía Nacional detiveron en Vigo tres homes que foron sorprendidos polo morador dunha vivenda cando tentaban entrar nela para roubar.
Os feitos, dos que informou este xoves a Policía Nacional, ocorreron no barrio de Teis e os presuntos ladróns trataron de acceder á vivenda pola xanela e fuxiron ao ser descubertos.
O morador viunos e, ademais de perseguilos pola rúa chamou a Policía, a cuxos axentes facilitou unha descrición detallada dos presuntos ladróns.
A Policía montou un dispositivo de procura durante o que observaron tres homes que trataban de ocultarse ao detectar a presenza policial e cuxa aparencia coincidía plenamente coa descrición facilitada pola testemuña, polo que os axentes procederon a darlles o alto e realizar as comprobacións pertinentes, localizando un par de luvas negras xunto a eles.
Fóronlles intervidas diversas doses de substancias estupefacientes, así como 350 euros en efectivo, que portaba un deles. Os tres detidos foron postos á disposición xudicial.
