Detido na Habana o profesor ourensán Martiño Ramos, fuxido logo de ser condenado a 13 anos por violar unha menor
Detido na Habana o profesor ourensán Martiño Ramos, fuxido logo de ser condenado a 13 anos por violar unha menor
A Policía era consciente da presenza de Ramos Soto en Cuba desde había meses e desde entón, conscientes da súa condena, estaba baixo observación, pero non fora detido
Parece que hai disposición por parte dos dous países por facilitar o seu traslado a España, aínda que non hai vixente un acordo de extradición
As autoridades cubanas detiveron na Habana ao cidadán español Martiño Ramos Soto, condenado a 13 anos e medio de cárcere no seu país por abusar violar a unha menor de idade, segundo puido confirmar este luns Efe.
A Policía Nacional Revolucionaria (PNR) arrestou hai uns días na capital cubana a Ramos, para quen o Goberno de España solicitara xa formalmente a súa extradición despois de que o pedise a Audiencia Provincial de Ourense o 31 de outubro.
Segundo fontes consultadas, a PNR era consciente da presenza de Ramos Soto en Cuba desde había meses e desde entón, conscientes da súa condena, estaba baixo observación, pero non fora detido.
Segundo explicaron a Europa Press fontes do Tribunal Superior de Xustiza de Galicia (TSXG), a Audiencia Provincial recibiu información policial de que o prófugo fora localizado en Cuba, polo que o 31 de outubro ditou orde internacional de detención e pediu "inmediatamente" a extradición.
Segundo as fontes do TSXG consultadas, a petición de extradición "xa foi tramitada polo Ministerio de Xustiza". Con todo, non existe un tratado activo de extradición con Cuba.
O propio subdelegado do Goberno corroborou que "non hai un tratado efectivo e activo de extradición". Aínda así, dixo que "o Goberno de España e a Policía seguen traballando para que esta persoa cumpra definitivamente a súa condena en España".
Ramos Soto é natural de Ourense, ten 50 anos e foi condenado a 13 anos e medio de prisión por abusos sexuais a unha alumna menor de idade, mediante prácticas sádicas, cando a vítima tiña entre 12 e 16 anos, informou a Sección de Fuxitivos.
Unha vez condenado en xullo pasado, Ramos Soto non atendeu o auto de entrada en prisión para cumprir a pena. Entón emitiuse unha orde de detención nacional, aínda que os axentes tiñan xa indicios de que o condenado se atopaba fóra de España.
Segundo a reconstrución policial da súa fuga, Ramos Soto desprazouse en xullo a Portugal para, desde Lisboa, voar a Brasil. De alí viaxou a Perú e logo, finalmente, a Cuba. A policía española consideraba que o condenado contaba con algún apoio na illa.
Coñecido polo seu activismo e compromiso político
Ademais de profesor de educación infantil e primaria, Ramos Soto era exmilitante da extinta En Marea e coñecido na súa cidade, Ourense, por impartir clases de música e polo seu activismo, así como por participar en todo tipo de actos culturais.
A súa inclusión na lista xunto con outros dez fuxitivos -hai coñecidos narcotraficantes, un asasino, un histórico atracador e varios agresores sexuais- débese, segundo a Sección de Fuxitivos a unha cuestión "estratéxica".
Ramos Soto é un dos dez nomes reclamados pola xustiza española cuxa localización e arresto é prioritaria para a Sección de Fuxitivos que, precisamente este luns, pediu a colaboración cidadá para solicitar posibles pistas.
